ប៉ៃលិន៖ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន និងភរិយាបានផ្ដល់អំណោយសប្បុរសធម៌ដល់ប្រជាពលរដ្ឋសំរាលទារកភ្លោះបីនាក់ដែលមានលំនៅដ្ឋានរស់នៅភូមិកូនភ្នំ សង្កាត់អូរតារ៉ៅ ខេត្តប៉ៃលិន នៅព្រឹកថ្ងៃទី២៤ ខែមិថុនានេះ។

ជំនួយការសម្ដេចតេជោគឺលោក សេង ទៀង ជាអ្នកនាំយកអំណោយនេះដោយផ្ទាល់ជូនគ្រួសារដែលបានកូនភ្លោះបីនេះ ដែលបានកើតនៅថ្ងៃទី៩ ខែមិថុនា ឆ្នាំ២០២២ នៅមន្ទីរពេទ្យគន្ធបុប្ផា ខេត្តសៀមរាប។ ជាកូនលើកដំបូង របស់ឪពុកឈ្មោះ ធ្លក រិន អាយុ ២៣ឆ្នាំ ម្តាយឈ្មោះ សេង តែន អាយុ ២៣ឆ្នាំ អ្នកទាំងពីរមានមុខរបរជាកសិករ។

អំណោយដ៏សប្បុរសធម៌ទាំងនោះរួមមាន ថវិកា ៥លានរៀល អង្ករ ៥០គីឡូក្រាម ទឹកដោះគោ ២កេសធំ ស្កសរ ៥គីឡូក្រាម សារុង ២ និងក្រម៉ា ២។

លោក សេង ទៀង មានប្រសាសន៍ថា ចាប់តាំងពីឆ្នាំ១៩៩៩ រហូតមកដល់បច្ចុប្បន្ននេះពោលគឺរយះពេលជាង ២៣ឆ្នាំកន្លងមកនេះ មានគ្រួសារប្រសូត្រទារកភ្លោះបីនាក់ ឫបួននាក់ ចំនួន ៣៨៧គ្រួសាររួចហើយ បានទទួលអំណោយឧបត្ថម្ភដ៏សប្បរសធម៌ ពីសម្តេចតេជោនិងសម្តេចកិត្តិព្រឹទ្ធបណ្ឌិត ក្នុងការជួយទំនុកបំរុងដល់ការលំបាកខ្វះខាតក្នុងជីវភាពរស់នៅប្រចាំថ្ងៃ ពិសេសការចិញ្ចឹមបីបាច់ ទារកភ្លោះបីនាក់ ត្រូវជាចៅៗរបស់សម្តេចទាំងទ្វេនៅពេលឆ្លងទន្លេរួច។

លោកបន្តថា ជំនួយឧបត្ថម្ភទាំងអស់នេះមិនមែនជាអំណោយរបស់រាជរដ្ឋាភិបាល អំណោយរបស់កាកបាទក្រហមកម្ពុជា ឬអំណោយរបស់គណបក្ស ដែលបំរើឲ្យសកម្មភាពនយោបាយនោះទេ ផ្ទុយទៅវិញអំណោយទាំងអស់នេះ គឺជាអំណោយទានកើត ចេញពីទឹកចិត្តជ្រះថ្លាប្រកបដោយការគិតគូររបស់សម្តេចតេជោនិងសម្តេចកិត្តិព្រឹទ្ធបណ្ឌិតដែលបានយល់ពីការលំបាកពិតប្រាកដចំពោះប្រជាពលរដ្ឋដែលមានប្រសូត្រទារកភ្លោះបី ឬបួននាក់៕